Texts: Boeci fragment

Uniform transcription

Diplomatic transcription

nos jove omne quandius que nos estam
de gran follia per folledat parllam
quar no nos membra per cui viuri esperam
qui nos soste tan quan per terra annam
5 e qui nos pais que no murem de fam
per cui salv esmes per pur tan que ll clamam

Nos ioue omne quan dius quenos estam
degran follia | per folledat parllam
quar nonos membra per cui uiuri | esperam
quinos soste tan quanper terra annam
5equi nos | pais que nomurem defam
percui saluesmes perpur tan | quell clamam.

nos jove omne menam ta mal jovent
que us non o preza si s trada son parent
senor ni par si ll mena malament
10 ni l us vel l aitre si s fai fals sacrament
quant o a fait mija no s en repent
e ni vers deu no n fai emendament
pro non es gaigre si penedenza n pren
dis que l a bresa mija nonqua la te
15 que eps lor forfazc sempre fai epsament
laisa n deu lo grant omnipotent
ki l mort et vius tot a in jutjamen
eps li satan son en so mandamen
ses deu licencia ja non faran torment

Nos ioue omne menam tamal iouent
que | us nonopreza sis trada son parent
senor nipar sill mena | mala ment
10ni l us uel laitre sis fai falssacrament |
quant o[+a]fait miia nosén repent.
eniuers deu non fai emenda|ment
pro non es gaigre sipenedenzan. pr en;
dis que labresa | mi ia non qua la te;
15que éps lor for farzc sempre fai epsament |
laisan. deu. lo grant omnipotent;
kil mort. etuius | tot a iniutiamen.
eps li satan son en so mandamen; |
ses deu licencia ia. non faran torment;

20 en anzs en dies foren ome fello
mal ome foren aora sunt [270] pejor
volg i boecis metre quastiazo
auvent la gent fazia en so sermo
creessen deu qui sostenc passio
25 per lui aurien trastut redemcio
mas molt s en penet quar non i mes foiso
anz per eveja lo mesdren e preiso

20Ens anzs. en | dies. foren. ome. fello;
mal ome foren. aorasunt | [270] peior.
uolg iboecis metre quastiazo.
au uent la gent fazia en | so sermo
cre essen deu qui sostenc passio.
25per lui auríen tras|tût redemcio
mas molt sen penét quar non imes foiso.
anz | per eueia lo mesdren e preiso.

donz fo boecis corps ag bo e pro
cui tan amet torquator mallios
30 de sapiencia no fo trop nuallos
tant en retenc que de tot no n fo blos
tan bo essemple en laiset entre nos
no cuid qu e roma om de so saber fos

Donz fo boecis corps ag bo epró |
cui tan amet torquator mallios.
30de sapiencia no fo trop nuallos. |
tant en retenc que detót non fo blos.
tan bo essemple en laiset | entre nos.
no cuid que roma om de so saber fos.

coms fo de roma e ac ta gran valor
35 aprob mallio lo rei emperador
el era l meler de tota la onor
de tot l emperi l tenien per senor
mas d una causa u nom avia genzor
de sapiencia l apellaven doctor
40 quan veng la fis mallio torquator
donc venc boeci ta gran dolors a l cor
no cuid aprob altre dols li demor

Cóms fo de roma | e ac tagran ualor.
35aprob mallio lorei emperador.
el eral meler | detota la onor
de tót lemperil tenien per senor
mas duna cau|sa u nom auia genzor.
de sapiencia la pellauen doctor.
40Quan | ueng la fis mallio torquator.
donc uenc boeci tagran dolors | al cor.
no cuid aprob altre dols lidemor.

morz fo mallios torquator dunt eu dig
ec vos e roma l emperador teiric
45 de l fiel deu no volg aver amig

morz fo mallios | torquator dunt eu dig.
ec uos e roma l emperador teiric. |
45del fiel deu no uolg auer amig.

no credet deu lo nostre creator
per zo no l volg boecis a senor
ni gens de lui no volg tener s onor
eu lo chastia ta be ab so sermo
50 e teirix col tot e mal sa razo
per grant evea de lui volg far fello
fez u breu faire per gran decepcio
e de boeci escrivre fez lo nom
e si l tramet e grecia la regio
55 de part boeci lor manda tal raizo
que passen mar guarnit de contenco
eu lor redra roma per traazo
lo senz teiric miga no fo de bo
fez sos mes segre si lz fez [271] metre e preso

No credet deu lonostre | creator
per zo nol uolg boecis asenor.
ni gens de lui no uolg | tener sonor.
eu lo chastia tabé ab so sermo.
50eteiríx col tot | emal sarazó.
per grant euea de lui uolg far fello.
Fez u breu | faire. per grán decepcio.
e de boeci escriure fez lo nom
e sil tra|mét e grecia la regio.
55de part boeci lor manda tal raizó. |
que passen mar guarnit de contencó.
eu lor redra roma per tra|azo.
lo sénz teiric. miga no fo de bo.
fez sos mes segre silz fez | [271] metre epreso.

60 e l capitoli l endema a l dia clar
lai o solien las altras leis jutjar
lai veng lo reis sa felnia menar
lai fo boecis e foren i soi par
lo reis lo pres de felni a reptar
65 qu el trametia los breus ultra la mar
a obs los grex roma volia tradar
pero boeci anc no venc e pesat
sal el en estant e cuidet s en salvar
l om no l laiset a salvament annar
70 cil li faliren que l solient ajudar
fez lo lo reis e sa charcer gitar

60El capitoli len dema al dia clar.
lai osolíen las | altras leis iutiar
lai ueng loreis sa fel nia menár
lai fo boecis | eforen. i soi par.
loreis lo pres de felnia reptar.
65quel trametía los | breus ultra la mar.
a óbs los gréx roma uolia tradár.
pero boeci | anc no uenc epesat.
sál él enestánt. e cuidet sen saluar.
lom. no l | laiset asaluament annár.
70cil lifalíren quel solient aiudar. |
fez lo lo reis esa charcer gitar.

ec vos boeci cadegut en afan
e granz kadenas qui l estan apesant
reclama deu de cel lo rei lo grant
75 domne pater e te m fiav eu tant
e cui marce tuit peccador estant
las mias musas qui ant perdut lor cant
de sapiencia anava eu ditan
plor tota dia faz cosdumna d efant
80 tuit a plorar repairen mei talant

Ec uos boeci. cadegut e nafán. |
e granz kdenas[=kadenas] qui lestán apesant.
reclama deu decél lo | rei lo grant.
75domne pater e tem fiaueu tant.
e cui marce tuit pec|cador estánt.
las mias musas qui ant perdut lor cánt.
de sapien|cia anaua eu ditan.
plor tota dia faz cosdumna de fant.
80tuit | a plorár repairen mei talant.

domne pater tu qui m sols goernar
e te m soli eu a toz dias fiar
tu m fezist tant e gran riqueza star
de tota roma l emperi aig a mandar
85 los savis omnes en soli adornar
de la justicia que grant aig a mandar
no t servij be no la m volguist laisar
per aizo m fas e chaitiveza star
non ai que prenga ne no posg re donar
90 ni noit ni dia no faz que mal pensar
tuit mei talant repairen a plorar

Domne pater tu quim sols goernar |
e tem soli eu a tóz dias fiar.
tum fezíst tánt e gran. riquezá stár |
detota roma lemperi aig amandar.
85los sauis omnes en soli ador|nár.
de la iusticia que grant áig amandár.
not seruii. b é nola m | uolguist laisar.
per aizóm fás e chaitiueza star.
non ái que prenga | ne no pósg re donar.
90ni nóit ni día no fáz que mal pensar.
tuit | mei talant re pairen aplorar.

hanc no fo om ta gran vertut agues
qui sapiencia compenre pogues
pero boecis no n fo de tot mespres
95 anc no n vist u qui tant en retegues
lainz e las carcers o el jazia pres
lainz comtava de l temporal cum es
de sol e luna cel [272] e terra mar cum es

Hanc no fo óm ta gran uertut | agues
quisapiencia compenre pogues.
pero boecis non fó de tot | mespres.
95anc non uist ú. qui tant en retegues.
la ínz elas car|cers o él iazia prés.
la inz comtáua. del temporal cum es.
desól eluna cél | [272] e terra. már. cum es.

nos e molz libres o trobam legen
100 dis o boecis e sso gran marriment
quant e la carcer avia l cor dolent
molt val lo bes que l om fai e jovent
com el es velz qui pois lo soste
quan ve a l ora que l corps li vai franen
105 per be qu a fait deus a ssa part lo te

Nos e molz libres o trobam legen. |
100dis o boecis esso gran marriment.
quant ela carcer auial | cor dolent.
molt uál lo bés que lom fai e iouent.
com el és | uélz qui pois lo sosté.
quan ue alóra quel córps liuái | franén.
105per be qua fait. deus assapart lo te.

nos de molz omnes nos o avem veut
om per veltat non a lo pel chanut
o es eferms o a afan agut

Nos de molz | omnes nos oauem ueút.
om per ueltát non á lo pel chanut. |
o es eferms oá. afan agút.

cellui vai be qui tra mal e jovent
110 e cum es velz donc estai bonament
deus a mes e lui so chastiament
mas quant es joves et a onor molt grant
et evers deu no torna so talant
cum el es velz vai s onors descaptan
115 quant se reguarda no n a ne tan ne quant
la pelz li rua hec lo kap te tremblant
morir volria e es e gran masant
trastota dia vai la mort reclaman
ella no l pren ne no l en fai semblant

cellui uai bé qui tra mal e iouént. |
110ecum ęs uelz donc estai bona ment.
deus amés e lúi so chasti|amént.
mas quant es ioues et á onór molt gránt.
et euers | deu no torna so talant.
cum el es uelz uai sonors descaptán. |
115quant se reguarda nón á netan ne quant.
la pélz li rúa héc lo | kapte tremblánt.
morir uolría e és e gran masánt.
tras|tota dia uai la mórt recla mán.
ella nol prén ne nol en fai | semblant;

120 drez es e bes que l om e deu s esper
mas non es bes que s fi e son aver
ta mala fe nulz om no pot veder
l om l a a l ma miga no l a a l ser
cum l us lo pert a l altre ve tener
125 e la morz a epsament mala fe
l om ve u ome quaitiu e dolent
o es malaptes o altre pres lo te
non a aver ni amic ni parent
e dunc apella mort ta dolzament
130 crida e ucha morz a me quar no ves
ella s fen sorda gens a lui non atend
quant menz s en guarda no sap mot quan lo s prent

120Dréz es e bés que lom e deu ses pér.
mas non es bés | ques fí e son auér.
ta malafénulz om no pót ueder.
lom la almá | miga no la al ser.
cum lus lo pért aláltre ué tener.
125ela mórz | á epsa ment mala fé.
lom ue u ome quaitiu e dolént.
oés | maláptes o áltre prés lo té.
non á· auér ní amíc ni parent. |
e dunc apella mort ta dolza ment.
130crída eúcha. morz | amé quar no ués.
ellas fén sor da gens alui non atend.
quant | menz sen guarda no sap mot quan los prent.

si cum la nibles [273] cobre l jorn lo be ma
si cobre avers lo cor a l xristia
135 qui tant i pessa que al no fara ja
e deu no s fia ni deus e lui e no ma
quan se reguarda per o res no l rema

Si cum la níbles | [273] cobrel iórn lo be má.
sicobre auérs lo cór al xristiá
135qui | tant i pessa que ál no fara ia.
e deu nos fia nideus elúi | eno má.
quan se reguárda peró res nol rema.

molt fort blasmava boecis sos amigs
qui lui laudaven dereer e uz dias antix
140 qu el era coms molt onraz e rix
et evers deu era tot sos afix

Molt fort | blasmaua boecis sós amigs.
qui lui laudáuen deréer euz | dias antíx.
140quel era cóms molt onraz erix.
et euers deu éra | tot sos afix.

molt lo laudaven e amic e parent
c ab damrideu se tenia forment
pero boecis trastuz los en desment
145 no s es acsi cum anaven dicent
cel non es bos que a frebla scala s te
qui tota ora sempre vai chaden
aquel qui l a non estai fermament
e quals es l om qui a ferma schala s te
150 bos xristias qui cre perfeitament
deu la paterna lo rei omnipotent
et en jhesu que ac tan bo talent
chi nos redems de so sang dolzament
e sanctum spiritum qui e bos omes desend
155 que que l corps faca eu li vai l arma dozen
bos cristians qui a ital eschala s te
cel no n quaira ja per negu torment

molt lo laudauen e amíc eparent.
cab damrideu | se tenia for ment.
pero boecis trastuz los en desmént.
145nos es acsi cum | anauen dicent.
cel non es bós que a frebla scala sté.
qui tota ora | sempre uai chaden.
a quel qui la non estai fermament.
equals | es lom qui aferma schalas té.
150bos xristias qui cre perfeita ment. |
deu la paterna lorei omnipotent.
et en ihesu que ac tán bo talent. |
chi nos redéms. deso sang dolza ment.
e sanctum spiritum qui ebos omes | desend.
155que quel corps faca eu li uai larma dozén.
bos cristians | qui a ital eschala ste.
cel non quaira ia pernegu torment.

cum jaz boecis e pena charceral
plan se sos dols e sos menuz pecaz
160 d una donzella fo lainz visitaz
filla s a l rei qui a gran poestat
ella s ta bella reluz ent lo palaz
lo mas o intra inz es granz claritaz
ja no es obs fox i ssia alumnaz
165 veder ent pot l om per quaranta ciptaz
qual ora s vol petita s fai asaz
cum ella s auca cel a de l cap polsat
quant be se dreca lo cel a pertusat
e ve lainz tota la majestat

Cum iáz | boecis e péna charceral.
plan se sos dols esos menuz pecaz.
160dúna | donzêlla fo lainz uisitaz.
fillas al rei qui a gran poestat.
ellas | ta bella reluzént lo palaz.
lo mas oíntra inz es granz claritaz. |
ia no es óbs fox issia alumnaz.
165ueder ent pót lom per quaranta ciptáz. |
qual oras uol petitas fai asáz.
cum ella sauca cel a del cap polsát. |
quant be se dreca lo cel a pertusat.
é ue lainz tota la maiestat. |

170 bella s la domna e l vis a tant preclar
davan so vis nulz om no s pot celar
ne eps li omne qui sun ultra la mar
no potden tant e lor [274] cors cobeetar
qu ella de tot no vea lor pessar
175 qui e leis se fia morz no l es a doptar

170Bellas la domna el uís a tant preclár.
dauan souís nulz om nos | pot celar.
ne éps li omne qui sun ultra la már
no potden tántelor | [274] cors cobeetár.
quella de tot no uea lor pessar.
175qui eleis se fia morz nole[=es] | a doptar.

bella s la domna mas molt es de longs dis
no s pot rascundre nulz hom denant so vis
hanc no vist omne ta grant onor agues
s il forfez tan dont ella s rangures
180 sos corps ni s anma miga per ren guaris
quoras que s vol s en a lo corps aucis
e pois met l arma en effern e l somsis
tal li comanda qui tot dias la bris
ella smetessma ten las claus de paradis
185 quoras que s vol lainz col sos amigs

Bellas la domna mas molt es de longs dias
nos pot rascúndre | nulz hom denant souis
hanc no uist omne ta grant onor agues.
sil for féz tan | dont ellas rangurés.
180sos corps ni sanma miga perrén guarís
quoras ques | uol sená lo corps aucís.
e pois met larma enefférn el somsís.
tal li com ánda | qui tot dias la brís.
ellas mét éss ma tén las cláus deparadis.
185quoras ques | uol laínz cól sos amigs.

bel sun li drap no sai nomnar lo fil
mas molt per foren de bon e de sobtil
ella se fez anz avia plus de mil
tan no son vel miga lor prez a vil

Bél sún si[=li] drap no sái nomnar lo fíl.
mas molt per fo|ren de bón e de sobtíl.
ella se féz. anz auía plus demil.
tán no son uél míga | lór préz a uíl.

190 ella medesma teiset so vestiment
que negus om no pot desfar neienz
pur l una fremna qui vers la terra pent
no comprari om ab mil livras d argent
ella ab boeci parlet ta dolzament
195 molt me derramen donzellet de jovent
que zo esperen que faza a lor talen
primas me amen pois me van aissent
la mia mort ta mal van deperden

190Ella medesma teiset so uestimént.
que negus óm no pót desfar | nei enz.
pur luna fremna qui uert[=uers] la terra pent.
no comprari om ab míl | liuras d argént.
ella ab boeci parlét ta dolza ment.
195molt me derramen | donzellét deiouent.
que zo esperen que faza alor talén.
primas me ámen pois me | uan aissent.
la mia mort ta mal uan deperdén.

bel sun li drap que la domna vestit
200 de caritat e de fe sun bastit
il sun ta bel e ta blanc e ta quandi
tant a boecis lo vis esvanuit
que el zo pensa uel sien amosit

Bél sun li drap que la | domna uestít.
200de caritat ede fe sun bastít.
il sun ta bél e ta blánc e ta quandi. |
tanta boecis louis esuanuit.
que el zo pensa uél sien amosit.

e l vestiment en l or qui es repres
205 desoz avia escript u pei grezesc
zo signifiga la vita qui en ter es
sobre la schapla escript avia u tei grezesc
zo signifiga de cel la dreita lei

E l uestiment | en lor qui es représ.
205de sóz áuia escript ú pei.π.grezésc.
zo signifiga la uita | qui en ter es.
sobre las chápla escript auia ú tei.θ.grezesc.
zo signifiga | de cél la dreita léi.

antr ellas doas depent sun l eschalo
210 d aur no sun ges mas nuallor no sun
per aqui monten cent miri auzello
alquant s en tornen aval arreuso
mas cil qui poden montar a l tei alcor
en epsa l ora se sun d altra color
215 ab la donzella pois an molt gran amor

antrellas doas depent sun les chaló.
210daur nosun gés | mas nuallor nosun.
per a qui monten cent miri auzello.
al quant sen tórnen | aual arreuso.
mas cil. qui poden montar al.θ. alcor.
enepsa | lora se sun daltra color.
215abla donzella pois an molt gran amor.

cals [275] es la schala de que sun li degra
fait sun d almosna e fe e caritat
contra felnia sunt fait de gran bontat
contra perjuri de bona feeltat
220 contr avaricia sun fait de largetat
contra tristicia sun fait d alegretat
contra menzonga sun fait de veritat
contra lucxuria sun fait de castitat
contra superbia sun fait d umilitat
225 quascus bos om si fai lo so degra
cal sun li auzil qui sun a l tei montat
qui e la scala ta ben an lor degras
zo sun bon omne qui an redems lor peccaz
qui tan se fien e sancta trinitat
230 d onor terrestri non an gran cobeetat

Cals | [275] es laschala de que sun li degra.
fait sun dal mósna efe ecaritát.
contra | felnia sunt fait de gran bontat.
contra periúri. de bona fe eltat. |
220Contra uaricia sun faitde largetát.
contra tristicia sun fait dalegretat. |
Contra menzónga sun fait de ueritat.
contra lucxuria sun fait de castitat. |
Contra superbia sun fait du militat.
225quascus bos óm si fái loso degra
cal sun | li auzil qui sun al tei montat.
quíelascála ta ben án lor degras.
zó sun | bo nómne qui an redems lor peccaz.
qui tan se fien e sancta trinitat.
230donór | terrestri non an grán cobeetat.

cal an li auzil significacio
qui de la schala tornen arreuso
zo sun tuit omne qui de joven sun bo
de sapiencia qui conmencen razo
235 e cum sun vell esdevenen fello
e fan perjuris e granz traicios
cum poisas cuida montar per l eschalo
cerqua que cerca no i ve miga de l so
ven lo diables qui guarda l baratro
240 ven acorren si l pren per lo talo
fai l acupar a guisa de lairo
fai l aparer de tot no l troba bo

Cal án li auzil signifació[=significació]
qui delaschala | tornen arreusó.
zo sun tuit omne qui de iouen sun bó.
desapiencia qui | conmencen razó.
235e cum sun uell esdeuenen felló.
e fan periuris e granz traiciós. |
cum poisas cuid a montar per leschalo.
cerqua quecerca noi ué miga delso. |
uén lo diables qui guardal baratro.
240uen acorren sil pren perlotaló.
fai | l acupár a guisa delairo.
fai laparer detót nol troba bó.

bella s la domna e granz per co sedenz
no vist donzella de son evaiment
245 ella s ardida si s foren soi parent
e sa ma dextra la domna u libre te
toz aquel libres era de fog ardenz
zo s la justicia a l rei omnipotent
si l om o forfai e pois no s en repen
250 et evers deu no n faz amendament
quora que s vol ab aquel fog l encent
ab aquel fog s en pren so vengament
cel bona i vai qui amor ab lei pren
qui be la ama e per bontat la te
255 quan se reguarda be bo merite l en rent

Bellas la | domna e granz per cosedenz.
no uist donzella de son euaiment.
245ellas | ardida sis foren soi parent.
é sama déxtra la domna ú libre té.
tóz | aquel libres era de fog ardenz.
zos la iusticia al réi omnipotent. |
silom oforfái epois no sen repen.
250et euers deu non faza mendament. |
quora ques uol ab a quel fog l encent.
ab aquel fog sen prén so uenga|ment
cel bonai uai qui amor ab lei pren.
qui be la áma e per bontat | la te.
255quan se re guarda bebo merite len rent.

e l ma senestre ten u sceptrum reial
zo signifiga justici corporal
de pec [...]

El ma | senestre tén ú sceptrum reial.
zo signifiga iustici corporal.
de pec |