Texts: Life of Saint Leger

Composed 10th century in Picardy|Wallonia; manuscript copied c. 1000 in Limoges, Limousin. Source manuscript: Clermont-Ferrand, Bibliothèque municipale, 240. Manuscript image: http://www.ogr-corpus.org/docs/ms240-159v

Life of Saint Leger (SLeger). In T. Rainsford (ed.) Old Gallo-Romance Corpus, version 1.0. Stuttgart, Institut für Linguistik/Romanistik, 2025. http://ogr-corpus.org.

Uniform transcription

Diplomatic transcription

[159v] [c]

dominedeu devemps lauder
et a sos sancz honor porter
in su amor cantomps de l sanz
quae por lui augrent granz aanz
5 et or es temps et si est biens
quae nos cantumps de sant lethgier

primos didrai vos de ls honors
quae il awret ab duos seniors
apres ditrai vos de ls aanz
10 que li suos corps susting si granz
et ewruins cil deumentiz
que lui a grand torment occist

[160r] [a]

quant infans fud donc a ciels temps
a l rei lo duistrent soi parent
15 qui donc regnevet a ciel di
cio fud lothiers fils baldequi
il le amat deu lo covit
rovat que litteras apresist

didun l ebisque de peitieus
20 lui l comandat ciel reis lothiers
il lo reciut tam ben en fist
ab u magistre sempre l mist
qui llo doist bien de ciel savier
don deu servier por bona fied

25 et cum il l aut doit de ciel art
rende l qui lui lo comandat
il lo reciu bien lo nonrit
cio fud lonx tiemps ob se lo s ting
deus l exaltat cui el servid
30 de sanct maxenz abbas divint

ne fud nuls om de l son juvent
qui mieldre fust donc a ciels tiemps
perfectus fud in caritet
fid aut il grand et veritiet
35 et in raizons bels oth sermons
humilitiet oth per trestoz

cio sempre fud et ja si er
qui fai lo bien laudaz enn er
et sanz letgiers sempre fud bons
40 sempre fist bien o que el pod
davant lo rei en fud laudiez
cum il l audit fu li n amet

a se l mandat et cio li dist
a curt fust sempre lui servist
45 il l exaltat e l onorat
sa gratia li perdonat
et hunc tam bien que il en fist
de hostedun evesque en fist

quandius visquet ciel reis lothier
50 bien honorez fud sancz lethgiers
il se fud morz damz i fud granz
cio controverent baron franc
por cio que fud de bona fiet
de chielperig feissent rei

55 un compte i oth pres en l estrit
ciel eps num auret eurui
ne vol reciwre chielperin
mais li seu fredre theori
ne l condignet nuls de sos piers
60 re volunt fair estre so gred

[b]

il lo presdrent tuit a conseil
estre so gret en fisdren rei
et ewruins ott en gran dol
porro que ventre no ls en poth
65 por ciel tiel duol rova s clergier
si s en intrat in un monstier

reis chielperics tam bien en fist
de sanct lethgier consilier fist
quandius a l suo consiel edrat
70 incontra deu ben si garda
lei consentit et observat
et son regnet ben dominat

ja fud tels om deu inimix
qui l encusat ab chielpering
75 l ira fud granz cum de seinor
et sancz lethgiers oc s ent pavor
ja lo sot bien il le celat
a nuil omne no l demonstrat

quant ciel irae tels esdevent
80 paschas furent in eps cel di
et sancz lethgiers fist son mistier
missae cantat fist lo mul ben
pobl en lo rei communiet
et sens cumgiet si s en ralet

85 reis chielperics cum il l audit
presdra sos meis a lui s tramist
cio li mandat que revenist
sa gratia por tot ouist
et sancz lethgiers ne s soth mesfait
90 cum vit les meis a lui ralat

il cio li dist et adunat
tos consilier ja non estrai
meu evesquet ne m lez tener
por te qui sempre vols aver
95 en u monstier me laisse intrer
pos ci non posc lai vol ester

enviz lo fist non voluntiers
laisse l intrar in u monstier
cio fud lisos ut il intrat
100 clerj ewrui ille trovat
cil ewruins molt li vol miel
toth per enveia non per el

et sancz lethgiers fist so mistier
ewrui prist a castier
105 ciel ira grand et ciel corropt
cio li preia [c] laissas lo toth
fus li por deu ne l fus por lui
cio li preia paias ab lui

et ewruins fist fincta pais
110 cio l demonstrat que si paias
quandius in ciel monstier instud
cio l demonstrat amix li fust
mais en avant vos cio aurez
cum ill edrat por mala fid

115 rex chielperings il se fud morz
por lo regnet lo sowrent toit
vindrent parent e lor amic
li sanct lethgier li ewrui
cio confortent ad ambes duos
120 que s ent ralgent in lor honors

et sancz lethgiers den fistdra bien
quae s en ralat en s evesquet
et ewruins den fisdra miel
quae donc deveng anatemaz
125 son quev que il a coronat
toth lo laisera recimer

dominedeu il cio laissat
et a diable comandat
quar donc fud miels et a lui vint
130 il voluntiers semper reciut
cum fulc en aut grand adunat
lo regne prest a devastar

a foc a flamma vai ardant
et a gladies percutan
135 por quant il pot tan fai de miel
por deu ne l volt il observer
ciel ne fud nez de medre vius
qui tal exercite vidist

ad ostedun a cilla ciu
140 dom sanct lethgier vai asalier
ne pot intrer en la ciutat
defors l asist fist i gran miel
et sancz lethgiers mul en fud trist
por ciel tiel miel quae defors vid

145 sos clerjes pres revistiz
et ob ses croix fors s en exit
porro n exit vol li preier
quae tot ciel miel laisses por deu
ciel ewruins qual hora l vid
150 penre l rovat lier lo fist

[160v] [a]

hor en aurez las poenas granz
quae il en fisdra li tiranz
li perfides tam fud cruels
lis ols de l cap li fai crever
155 cum si l aut fait mis l en reclus
ne soth nuls om que s devenguz

am las lawras li fai talier
hanc la lingua quae aut in quev
cum si l aut toth vituperet
160 dist ewruins qui tan fud miels
hor a pordud dom deu parlier
ja non podra mais deu laudier

a terra joth mult fo afflicz
non oct ob se cui en calsist
165 super li piez ne pod ester
qui toz los at il condemnets
or a perdud don deu porlier
ja non podra mais deu laudier

sed il non ad lingu a parlier
170 deus exaudis lis sos pensaez
et si el non ad ols carnels
en cor los ad etspiritiels
et si en corps a grand torment
l anima n awra consolament

175 guenes oth num cui l comandat
la jus en cartres l en menat
et en fescant in ciel monstier
illo reclusdrent sanct lethgier
dominedeus in ciel flaiel
180 i visitet lethgier son serw

la labia li restaurat
si cum des anz deu pres laudier
et hanc en aut merci si grand
porlier lo fist si cum des anz
185 donc pres lethgiers a preier
poble ben fist credre in deu

et ewruis cum il l audit
credre nne l pot antro que l vid
cum il lo vid fud corroptios
190 donc oct ab lui dures raizons
e l corps exastra a l tirant
peis li promest ad en avant

a grand furor a gran flaiel
si l recomanda laudebert
195 cio li rova et noit et di
miel li fesist dontre qu el viu
ciel laudeberz fura buons om
et sanct lethgier duis a son dom

[b]

il li vol faire mult amet
200 bewre li rova aporter
garda si vid grand claritet
de cel vindre fud de par deu
et si cum roors in cel es granz
et si cum flammes clar ardanz

205 cil laudeberz qual hora l vid
torne s a ls altres si llor dist
ciest omne tiel mult aima deus
por cui tels causa vin de ciel
por ciels signes que vidrent tels
210 deu presdrent mult a conlauder

tuit li omne de ciel pais
trestuit apresdrent a venir
et sancz lethgiers lis prediat
dominedeu il les lucrat
215 rendet ciel fruit spiritiel
quae deus li auret perdonat

et ewruins cum il l audit
credere ne l pot antro que l vid
cil biens qu el fist cil li pesat
220 occidere lo commandat
quatr omnes i tramist armez
que lui alessunt decoller

li tres vindrent a sanct lethgier
jus se giterent a sos pez
225 de lor pechietz que aurent faiz
il los absols et perdonet
lo quarz uns fel nom a vadart
ab un inspieth lo decollat

et cum il l aud tollut lo quev
230 lo corps estera sobre ls piez
cio fud lonx dis que non cadit
lai s aprosmat que lui firid
entro li talia los pez de jus
lo corps stera sempre sus

235 de l corps asaz l avez audit
et de ls flaiels que grand sustint
l anima reciunt dominedeus
a ls altres sanz en vai en cel
il nos aiud ob ciel senior
240 por cui sustinc tels passions

finit finit ludendo dicit

FINIT. FINIT LUDENDO DICIT;

OGR Corpus